Exo 6 | NdeIBE | STEP | Ngakho uJehova wasesithi kuMosi, “Uzabona esengizakwenza kuFaro khathesi. Ngenxa yamandla esandla sami uzabavumela bahambe, ngenxa yamandla esandla sami uzabaxotsha elizweni lakhe.”

Exodus 6

1 Ngakho uJehova wasesithi kuMosi, “Uzabona esengizakwenza kuFaro khathesi. Ngenxa yamandla esandla sami uzabavumela bahambe, ngenxa yamandla esandla sami uzabaxotsha elizweni lakhe.”

2 UNkulunkulu waphinda wathi kuMosi, “NginguJehova.

3 Ngazibonakalisa ku-Abhrahama, ku-Isaka lakuJakhobe njengoNkulunkulu uSomandla, kodwa ngegama lami elithi ‘Jehova’ kangizange ngizibonakalise kubo. 4 Ngaphinda ngenza isivumelwano labo ukuze ngibanike ilizwe leKhenani lapho ababehlala khona njengabezizweni. 5 Phezu kwalokho sengikuzwile ukububula kwabantu bako-Israyeli besebugqilini ngaphansi kwamaGibhithe, ngasengikhumbula isivumelwano sami.

6 “Ngakho tshela abako-Israyeli ukuthi nginguJehova, njalo ngizalikhulula embusweni onzima wamaGibhithe, ngizalikhulula ukuze lingabi yizigqili zabo, njalo ngizalikhulula ngesandla eseluliweyo langezimangaliso.

7 Ngizalemukela njengabantu bami njalo ngizakuba nguNkulunkulu wenu. Yikho lizakwazi ukuthi nginguJehova uNkulunkulu owalikhupha embusweni olukhuni wamaGibhithe. Ngizalikhulula ukuze lingabi yizigqili zabo. 8 Njalo ngizaliletha elizweni engafunga ngesandla sami esiphakemeyo ukulinika u-Abhrahama, u-Isaka loJakhobe. Ngizalinika lona ukuze libe ngelenu. Mina nginguJehova.”

9 UMosi wabika lokhu kwabako-Israyeli kodwa kabazange bamlalele ngenxa yokudangala kwabo lobugqili obulochuku.

10 UJehova wasesithi kuMosi, 11 “Hamba uyetshela uFaro iNkosi yaseGibhithe ukuthi avumele abako-Israyeli baphume elizweni lakhe.”

12 Kodwa uMosi wathi kuJehova, “Nxa abako-Israyeli bengangilaleli, kuyini okungenza ukuthi uFaro angilalele, njengoba ngikhuluma ngigagasa?”

Umbhalo Wendlu Yakwabo kaMosi lo-Aroni

13 UJehova wakhuluma loMosi lo-Aroni mayelana labako-Israyeli loFaro inkosi yaseGibhithe wabalaya ukuthi bavumele abantu bako-Israyeli ukuthi baphume eGibhithe.

14 Laba bayizinhloko zezindlu zaboyise: Amadodana kaRubheni, izibulo lika-Israyeli ngoHanoki, loPhalu, loHezironi, loKhami. Laba babengabosendo lukaRubheni.

15 Amadodana kaSimeyoni kwakunguJemuweli, loJamini, lo-Obadi, loJakhini, loZohari, loShawuli olonina oweyengumKhenani. Laba babengabosendo lukaSimeyoni.

16 La ngamabizo amadodana kaLevi ngokwemibhalo yabo: UGeshoni, loKhohathi, loMerari. ULevi waphila iminyaka elikhulu lamatshumi amathathu lesikhombisa.

17 Amadodana kaGeshoni ngezizukulwana zabo ayenguLibhini, loShimeyi, lemuli zabo.

18 Amadodana kaKhohathi ayengo-Amramu, lo-Izhari, loHebhroni lo-Uziyeli. UKhohathi waphila iminyaka elikhulu elilamatshumi amathathu lantathu.

19 Amadodana kaMerari ayenguMaheli loMushi. Laba babengabosendo lukaLevi, ngokwemibhalo yabo.

20 U-Amramu wathatha uJokebedi owayengudadewabo kayise. Wamzalela u-Aroni loMosi. U-Amramu waphila iminyaka elikhulu lamatshumi amathathu lesikhombisa.

21 Amadodana ka-Izhari nguKhora, loNefegi loZikhiri.

22 Amadodana ka-Uziyeli nguMishayeli lo-Elizafani loSithiri.

23 U-Aroni wathatha u-Elisheba indodakazi ka-Aminadabi. U-Elisheba wayengudadewabo kaNaheshoni. Wamzalela uNadabi, lo-Abhihu, lo-Eliyazari, lo-Ithamari. 24 Amadodana kaKhora ayengu-Asiri, lo-Elikhana, lo-Abhiyasafi. Laba babengabosendo lukaKhora. 25 U-Eliyazari indodana ka-Aroni wathatha omunye wamadodakazi kaPhuthiyeli. Wamzalela uFinehasi. Laba-ke yibo ababengabakhokheli bezimuli zikaLevi, ngendlu yinye ngayinye.

26 Yibo labo o-Aroni lo-Mosi uJehova athi kubo, “Khokhelani abantu bami bako-Israyeli libakhuphe elizweni laseGibhithe ngamakhulu abo.”

27 Yibo laba abaya kuFaro inkosi yase-Gibhithe mayelana lokukhupha abantu bako-Israyeli eGibhithe. Kwakuyibo oMosi lo-Aroni.

U-Aroni ukhulumela uMosi

28 Ngesikhathi uJehova ekhuluma loMosi eGibhithe, 29 wathi kuye, “NginguJehova. Tshela uFaro inkosi yaseGibhithe yonke into engikutshela yona.”

30 Kodwa uMosi wathi kuJehova, “Njengoba ngikhuluma ngigagasa, kambe kuyini okungenza ukuthi uFaro azihluphe ngokungilalela?”